Semana de Cine de Lugo 2010

Loado sexa o cine que nos permite cada setembro facer festa na cidade de Lugo na honra da máis nova das grandes artes, sétima lle correspondeu cronoloxicamente, da que somos devotos desde hai moito tempo.

Setembro é para Lugo o mes máis cinematográfico, marcando con cine a separación temporal entre o verán que remata e as festas do San Froilán a punto de comezar, sendo esta inmersión cinematográfica o tratamento que os lucenses precisamos para entrar nas festas maiores e logo soportar unha nova tempada laboral e social chea de incertezas.

Ofrecemos aos lucenses unha ampla programación que cumpre cos nosos desexos de facilitar unha panorámica anual do cine de autor, na que todos os afeccionados ao cine poidan ver reflectidas as tendencias, as novidades, a realidade dos creadores e das creacións, con olladas ao pasado, á historia, a filmes e protagonistas que nunca deberán ser esquecidos.

Desexamos a todos unha feliz XXXII Semana de Cine e a todos invitamos a participar.

Que o cine nos invada, nos inspire e nos acompañe sempre!.


Xulio Xiz,

Presidente do Grupo Fotocinematográfico FONMIÑÁ