O vello Castilla está absolutamente convencido de saber o que se debe facer en cada ocasión onde interveñen a ética e os principios. Un día dáse conta de que ten o número 48 da antiga revista Tertulias, xusto o que lle falta ao seu novo xefe para completar unha colección que mantén como afección. Castilla négase a venderlle este número da revista fronte a toda a plana maior da empresa “porque non todo se pode comprar”. O seu xefe proponse demostrarlles a todos, sen botalo, que logrará quebrar a vontade do vello Castilla. Ao final, todo será unha cuestión de principios.

Dirixe Rodrigo Grande (Rosario, Arxentina, 1974), que á idade de 18 anos ingresa na Universidade do Cine (Bos Aires), onde realiza a súa primeira curtametraxe en 16 mm: La pared y la lluvia (1994), que o levaría por diversos festivais internacionais incluíndo o de San Petersburgo (Rusia). Juntos, in Any Way (1997) sería a súa seguinte curtametraxe, xa en 35 mm., a raíz de ser o gañador do concurso de guións do Instituto Nacional de Cine e Artes Audiovisuais. Esta será incluída na longametraxe Historias Breves II. Á par da súa carreira de curtametraxista, Grande formou parte dos equipos técnicos de diversas longametraxes arxentinas nas áreas de son, escenografía e dirección. 

Rosarigasinos, presos del olvido (2001), a súa primeira longametraxe como guionista e director, foi producida por José Martínez Suárez e conta como produtor asociado con Adolfo Aristarain. O elenco estaba encabezado por Federico Luppi, Ulises Dumont e María José Demare. En 2007 escribe os guións do programa de televisión Los Cuentos de Fontanarrosa, que se emite en prime time no Canal 7, coa participación en cada capítulo dos máis importantes actores nacionais.

Son, en total, 33 programas que adaptan 70 contos do autor. O programa é nominado para 9 premios Martín Fierro incluíndo mellor Unitario/Miniserie e a Rodrigo como mellor Autor/Libretista. O programa tamén é seleccionado para optar ao premio Clarín de TV como mellor Ficción Unitaria.