Presentouse no Festival de Cine Español de Málaga

Todo empeza en “Xantarella”, un restaurante de alta cociña de mercado situado no barrio de Chueca, en Madrid. A Maxi, o seu xefe de cociña e orgulloso propietario, as cousas non lle poden ir mellor: a punto de entrar nos corenta, o seu local soa como próximo destinatario dunha prestixiosa estrela Michelín. Para conseguila conta con Alex, a súa xefa de comedor e mellor amiga, e cun equipo de cociña que, aínda que ás veces se porta coma unha clase de parvulario, faille ás veces de familia. Pero, a ambición profesional de Maxi verase truncada pola aparición de Edu e Alba, os seus fillos, de quince e seis anos, dos que ten que facerse cargo debido á repentina morte da súa nai. Nos planes de Maxi non encaixa o convivir con eses nenos, froito dun matrimonio de escaparate aos que tivo que abandonar ao saír do armario. Pero iso non é o único que non encaixa nos seus plans. A chegada dun novo veciño, Horacio Peretti, un atractivo ex futbolista arxentino, acabará de poñer as vidas de Maxi, Alex, Edu e Alba patas arriba. O amor, a familia, os celos e a paternidade son ingredientes cos que Maxi terá que aprender a cociñar, desde “Xantarella”, a súa nova vida.

É a primeira longametraxe dirixida por Nacho G. Velilla, cunha ampla formación académica vinculada desde os inicios ao ámbito xornalístico audiovisual e especializada na Universidade de Coventry (Inglaterra) na rama de Film & Television. Nacho G. Velilla fixo a súa inmersión no mundo da televisión como guionista e director tras ser redactor en Antena 3 e no Heraldo de Aragón. Empezou traballando como director e guionista de vídeos musicais e do documental Visiones artísticas para el fin del Milenio. A gran oportunidade para demostrar as súas boas dotes para a comedia veu da exitosa serie Médico de Familia, producida por Globomedia para Telecinco, na que Velilla era guionista. A produtora non dubidou en volver a contar con el, esta vez para a dirección, guión e produción executiva da mítica 7 Vidas, de Aída, e tamén foi director e coordinador de guións de Gominolas, emitida en Cuatro.