Cando Mourtada Seck foi encerrado no CIE de Aluche, perdeu, entre outros moitos, o seu dereito á propia identidade. Pasou a ser un número, igual que o resto dos alí internos. Samuel, que emigrou a España coa axuda económica da súa familia en busca dunha vida mellor, foi tamén detido e internado en dous destes centros á espera de ser deportado. Peggy, cuxo marido foi expulsado oito días antes do nacemento da súa filla e máis tarde golpeado e maltratado polos axentes que o acompañaban no voo de volta ao seu país, viu o seu proxecto de vida truncado desde o momento en que o seu marido foi arrestado. As súas historias tecen o fío narrativo dun documental que dá a coñecer algunhas das cuestión máis relevantes e polémicas en torno á loita contra a inmigración irregular que ten, nos Centros de Internamento de Estranxeiros, unha das súas principais ferramentas.