Aurelio Romay, un mozo humilde e apoucado, abandona a súa aldea para instalarse na Coruña, onde traballará para Fabián Mouriz, propietario dunha consignataria de barcos. Mouriz abusa dos emigrantes que, desesperados por marchar a América, non dubidan en darlle os cartos que non teñen, a cambio de que axilice uns trámites que el adoita atopar defectuosos. Romay faise mozo de Guadalupe, unha rapaza veciña da pensión e, empeñado en prosperar para poder casar con ela, intenta manterse á marxe dos manexos do seu xefe. Un día chega á oficina Juan Cadaval que, con todos os seus papeis en regra, pretende emigrar á Arxentina, onde ten un parente rico que lle ofreceu traballo. Pero Mouriz vende os seus documentos para que outro viaxe no seu sitio. Contravindo as ordes, Aurelio devólvelle a documentación ao seu lexítimo dono.